ភ្នំពេញ ៖ ដើម្បីជំរុញការងារជួសជុល និងអ៊ុតកៅស៊ូACឲ្យបានទាន់ពេលវេលាទៅតាមគម្រោង ដែលគ្រោងទុកក្នុងរយៈពេល៣ខែឲ្យបានរួចរាល់ រដ្ឋបាលរាជធានីភ្នំពេញបាននិងកំពុងមមាញឹក ក្នុងការបើកការដ្ឋានជួសជុល និងអ៊ុតកៅស៊ូAC លើបណ្ដោយផ្លូវនានា ដែលកំពុងទទួលរងការខូចខាត ក្នុងរដូវវស្សាកន្លងមកនេះ។
ជាក់ស្ដែងនៅថ្ងៃទី៣០ ខែមករា ឆ្នាំ២០១៧ រដ្ឋបាលរាជធានីភ្នំពេញ បាននិងកំពុងដំណើរការអ៊ុតកៅស៊ូការដ្ឋានថ្មី គឺ ផ្លូវលេខ ២៨៥ ចាប់ពីផ្លូវលេខ ៥២៨ ដល់ផ្លូវលេខ ៥៦៦ ក្នុងខណ្ឌទួលគោក។
មន្ត្រីរដ្ឋបាលរាជធានីភ្នំពេញបានឲ្យដឹងថា នេះជាគម្រោងយុទ្ធនាការជួសជុលកែលម្អផ្លូវឡើងវិញ សរុបចំនួន៥៧ខ្សែ នៅក្នុងខណ្ឌចំនួន៩ ក្នុងរាជធានីភ្នំពេញ ដែលរដ្ឋបាលរាជធានីភ្នំពេញក្រោមការដឹកនាំរបស់លោកប៉ា សុជាតិវង្ស អភិបាលរាជធានីភ្នំពេញដាក់ចេញជាគម្រោងក្រោយពី ទទួលការខូចខាតដោយសារទឹកភ្លៀង និងដោយសាររថយន្តដឹកធ្ងន់លួចចូលក្រុងក្នុងរដូវវស្សាកន្លងមក។
ក្រៅពីផ្លូវ៥៧ខ្សែ ក្នុងគម្រោង ដែលបានបើកការដ្ឋានជួសជុល ក្នុងយុទ្ធនាការ៣ខែនេះ ក៏នៅមានផ្លូវប្រភេទកៅស៊ូប្រភេទបេតុង សរុបចំនួន១៨០គីឡូម៉ែត្រ ដែលរដ្ឋបាលរាជធានីភ្នំពេញ នឹងត្រូវស្ថាបនានៅក្នុងផែនការឆ្នាំ២០១៧ផងដែរ៕
កម្ពុជាថ្មី
ស្រីរ័ត្ន
No comments:
Post a Comment