បាត់ដំបង ៖ បច្ចុប្បន្នគេសង្កេតឃើញថា មានប្រជាកសិករជាច្រើន ដែលរស់នៅតាមទីជនបទ ក្រោយពីទំនេរដៃក្នុងការប្រមូលផលស្រូវរួចមក ក៏បាននាំគ្នាប្រកបមុខរបរថ្មីមួយទៀត គឺដាក់អំពូលភ្លើងដើម្បីចាប់យកចង្រិត ឬកូនសត្វដទៃទៀត ដែលរស់នៅតាមវាលស្រែ និងក្នុងទឹកបឹង ។
លោកអុំ វ៉ាន់ សារ៉េត អាយុ៦៣ឆ្នាំ រស់នៅឃុំព្រៃតូច ស្រុកមោងឫស្សី ខេត្តបាត់ដំបង បានរៀបរាប់ថា ក្រោយពីសម្រាកពីកិច្ចការងារស្រែចម្ការរួចមក លោកអុំជាមួយនឹងកូនប្រុសបានឆ្លៀតពេលទំនេរដើរពង្រាយខ្សែភ្លើង ដើម្បីដាក់អំពូលភ្លើងព៌ណស្វាយនៅតាមវាលស្រែចាប់យកពពួកចង្រិត កន្ទាទូក និង កន្តេះឡង់ជាដើម ។ល។ គ្រាន់បានជួយសម្រាលដល់ជីវភាពប្រចាំថ្ងៃបានមួយកម្រិត ។
លោកអុំបានបន្តថា ទោះបីជាពេលនេះមានការខ្សត់ខ្សោយទឹកនៅតាមវាលស្រែក៏ដោយ ក៏ពពួកសត្វទាំងនេះវានៅតែមានជាហូហែរ ដោយសារតែវាបានហោះហើរមកពីទីឆ្ងាយៗសំដៅមកកាន់ទីកន្លែងដែលយើងចង់បានវា ព្រោះតែពន្លឺភ្លើងដែលមានព៌ណស្វាយនេះអាចទាក់ទាញពួកវាឲ្យហោះមករកដោយមិនអាចប្រកែកបាន ។
ដោយសារតែមុខរបរនេះមានអ្នករកច្រើន ដូច្នេះហើយបានជាតម្លៃចង្រិតមិនសូវបានថ្លៃប៉ុន្មានទេ ប៉ុន្តែវាគ្រាន់បើជាងទុកពេលវេលាឲ្យនៅទំនេរចោលឥតប្រយោជន៍ ទោះជាការលក់ចេញទៅឲ្យម៉ូយបានតែតម្លៃ៥ពាន់រៀលក្នុងមួយគីឡូក្រាមក៏ដោយ ។
លោកអុំក៏បានក្រើនរំលឹកផងដែរអំពីការទិញយកទៅបរិភោគ ព្រោះមួយរយៈពេលមុន មានប្រជាពលរដ្ឋមួយចំនួនបានប្រើប្រាស់សាប៊ូដាក់ចូលទៅក្នុងទឹក ដែលដាក់ត្រងពីក្រោមអំពូលភ្លើងដើម្បីឲ្យកូនសត្វទាំងនេះធ្លាក់ចូល ហើយមិនអាចហោះហើរទៅវិញបាន ព្រោះវាមានសភាពពុលនឹងជាតិសាប៊ូ ដូច្នេះបានជានៅពេលដែលយើងយកវាទៅចម្អិនដើម្បីទទួលទាន គឺត្រូវលាងសម្អាតឲ្យបានច្រើនសា ប៉ុន្តែពេលនេះប្រជាពលរដ្ឋមានការយល់ដឹងច្រើន ព្រមទាំងបានកាត់បន្ថយនូវការប្រើប្រាស់សាប៊ូបែបនេះ ព្រោះវាអាចធ្វើឲ្យប៉ះពាល់ដល់សុខភាពអ្នកដែលទិញយកទៅបរិភោគ៕
កម្ពុជាថ្មី
សោ និយមរ័ត្ន
No comments:
Post a Comment