កំណត់ហេតុខ្ញុំ

យុវតីខ្មែរ ដែលមានរូបសម្បត្តិស្រស់សោភា និងអត្តចរិតស្លូតបូត និងរួសរាយរាក់ទាក់ កញ្ញា ប៉ែន ពណ្ណាវឌ្ឍន៍ មិនត្រឹមតែមានសមត្ថភាព ឆក់យកចំណាប់អារម្មណ៍ទស្សនិកជន និងគណៈកម្មការ ក្នុងព្រឹត្តិការណ៍ប្រកួតបវរកញ្ញាឯកកម្ពុជា ឆ្នាំ ២០១៦ ប៉ុណ្ណោះទេ ប៉ុន្តែបវរកញ្ញាឯកកម្ពុជា ដែលទទួលបានជ័យលាភីលេខ ៤ រូបនេះ បានធ្វើឱ្យក្រសែភ្នែកទស្សនិកជនអន្តរជាតិ និងគណៈកម្មការស្រឡាំងកាំង ចំពោះរាងដ៏ស្រឡូន និងរ៉ូបបែបស៊ីវិល័យរឹបរាងដ៏តូចច្រឡឹងរបស់នាង នៅក្នុងព្រឹត្ដិការណ៍ប្រកួតបវរកញ្ញាទេសចរណ៍អន្តរជាតិ Miss Tourism Queen of the Year International 2016 នៅទីក្រុងសៀងហៃប្រទេសចិន តំណាងឱ្យព្រះរាជាណាចក្រកម្ពុជា ដែលបានប្រព្រឹត្ដទៅ ចាប់ពីថ្ងៃទី ២៨ ខែវិច្ឆិការ ដល់ថ្ងៃទី ១៨ ខែធ្នូ ឆ្នាំ ២០១៦ កន្លងទៅនេះ។

ផ្ដើមចេញពីជ័យលាភីបវរកញ្ញាសាកលវិទ្យាល័យម្នាក់ ក្នុងចំណោម ១០ នាក់ (Miss University 2016) និងទទួលបានពាន់រង្វាន់ពិសេស(Special Award, Miss Personality) ពីការប្រកួតនោះ យុវនិស្សិតសេដ្ឋកិច្ចនៃសាកលវិទ្យាល័យភ្នំពេញអន្ដរជាតិវ័យ ១៩ ឆ្នាំ កញ្ញា ពណ្ណាវឌ្ឍន៍ បានបញ្ចេញសមត្ថភាពដ៏អស្ចារ្យរបស់នាង នៅលើឆាកអន្តរជាតិតំណាងឱ្យប្រទេសកម្ពុជា ក្នុងចំណោមបេក្ខនារី មកពីបណ្ដាប្រទេសជាង ៥០ ប្រទេស រហូតទទួលបានពានរង្វាន់ដល់ទៅ២ ត្រឡប់មកជូនមាតុភូមិវិញ ដែលពានរង្វាន់ទាំងនោះ បានឆ្លុះបញ្ចាំងពីរូបសម្បត្តិដ៏ល្អឯក ជាមួយនឹងរ៉ូបរាត្រីដ៏សមសួនរបស់នាង(Best Evening Wear Award) ដែលរចនាដោយកូនខ្មែរ(ហាងរចនាម៉ូដផារ៉ាឌី) និងពានរង្វាន់ Miss Charity Award ដែលឆ្លុះបញ្ចាំងពីសន្ដានចិត្ដបរិច្ចាគរបស់ ពណ្ណាវឌ្ឍន៍ នៅក្នុងព្រឹត្តិការណ៍ជាអន្តរជាតិនោះ។

លទ្ធផលគួរជាទីមោទនភាពនេះ សម្រេចបានមកពីការខិតខំប្រឹងប្រែងហាត់រៀន ទេពកោសល្យ រូបឆោមលោមពណ៌ និងសមត្ថភាពរបស់នាង ព្រមទាំងការជំរុញលើកទឹកចិត្ដពីមជ្ឈដ្ឋាន ជុំវិញខ្លួនរបស់នាងផងដែរ ដែលជាបច្ច័យដ៏សំខាន់ យិតយោងនាងឱ្យឈានដល់ចំណុចជោគជ័យដូចការរំពឹងទុក។ ចង់ដឹងថា កញ្ញា ពណ្ណាវឌ្ឍន៍ ទទួលបានបទពិសោធន៍អ្វីខ្លះ ពីព្រឹត្តិការណ៍ប្រកួតបវរកញ្ញាទេសចរណ៍អន្ដរជាតិ Miss Tourism Queen of the Year International 2016 នោះ កម្ពុជាថ្មីបានជួបសម្ភាសន៍ជាមួយនាង ដើម្បីចែករំលែកបទពិសោធន៍ដល់លោកអ្នក។

ការឡើងលើឆាកអន្តរជាតិ ពិតជាមានភាពខុសប្លែកខ្លះពីប្រទេសកំណើតរបស់ខ្លួន ដែលតម្រូវឱ្យបេក្ខនារីគ្រប់រូប ត្រៀមខ្លួនឱ្យរួចរាល់ដើម្បីធ្វើការប្រកួត។ ដោយឡែកសម្រាប់ ពណ្ណាវឌ្ឍន៍ នាងត្រូវរៀបចំខ្លួនឱ្យរួចជាស្រេច ដើម្បីឡើងប្រកួត នៅឯព្រឹត្តិការណ៍អន្ដរជាតិនេះ។ នាងបានប្រាប់ឱ្យដឹងថា ក្នុងនាមនាងជាបេក្ខនារីមួយរូប ដែលទៅចូលរួមព្រឹត្តិការណ៍នោះតំណាងឱ្យប្រទេសកម្ពុជា នាងបានរ៉ាប់រងកិច្ចការគ្រប់យ៉ាងដោយខ្លួនឯងផ្ទាល់រាប់តាំង ពីការស្លៀកពាក់ រហូតដល់ការ Make-Up អ៊ីចឹងវាជាបទពិសោធន៍មួយសម្រាប់នាង ដែលធ្វើឱ្យនាងកាន់តែមានភាពម្ចាស់ការ។

ពានរង្វាន់ជាបេក្ខនារី ដែលស្លៀករ៉ូបរាត្រីស្អាតជាងគេ(Best Evening Wear) និងពានរង្វាន់ Miss Charity បានធ្វើឱ្យយុវតីវ័យក្មេង ដែលតំណាងឱ្យកម្ពុជារូបនេះ មានអារម្មណ៍រីករាយរំភើបចិត្ដជាខ្លាំងរកថ្លែងមិនត្រូវ។ នាងនិយាយថា នាងមិននឹកស្មានថា អាចទទួលបានពានដល់ទៅ២នោះទេ ដោយសារតែនាងពុំបានដឹងថា កម្មវិធីនោះ មានរៀបចំឱ្យមានពាន Miss Charity ដែរ។ នៅក្នុងក្រដាសគេមិនបាន ប្រាប់ពីពាននេះនោះទេ ប៉ុន្ដែនៅពេលចូលរួមកម្មវិធីសប្បុរសធម៌ នាងបានបរិច្ចាគកាដូ នៅក្នុងកម្មវិធីនោះ។ ពិតជាចំឡែកក្នុងចិត្ដ នៅអំឡុងពេលប្រកាសលទ្ធផល ព្រោះរូបនាងត្រូវបាន គណៈកម្មការប្រកាសក្ដែងៗថា ជាបេក្ខនារីតំណាងឱ្យប្រទេសកម្ពុជាតែម្នាក់គត់ ដែលបានបរិច្ចាគទាន នៅក្នុងកម្មវិធីសប្បុរសធម៌ ខណៈបេក្ខនារីដទៃទៀត មកពីបណ្ដាប្រទេសផ្សេងៗ ពុំបានបរិច្ចាគឡើយ។

នាងបានប្រាប់បន្ថែមថា នៅព្រឹត្តិការណ៍នោះ នាងមានអារម្មណ៍រំភើបចិត្ដខ្លាំងមែនទែន ពីព្រោះកន្លងមក នៅពេលចូលរួមការប្រកួត គេតែងប្រាប់ឱ្យពុះពារគ្រប់បែបយ៉ាង ដើម្បីឈ្នះការប្រកួត ប៉ុន្ដែដោយឡែក ព្រឹត្តិការណ៍ប្រកួតជាលក្ខណៈអន្ដរជាតិ នៅទីក្រុងសៀងហៃប្រទេសចិនវិញ អ្នករៀបចំកម្មវិធីបាននិយាយថា សូមកុំគិតថា កម្មវិធីនេះជាការប្រកួតប្រជែងមួយ ដែលយើងត្រូវតែដណ្ដើមគ្នាយកពាននោះ ពីព្រោះថា ពាន និងម្កុដ មិនមានសម្រាប់បេក្ខជនគ្រប់គ្នានោះទេ ប៉ុន្ដែចំណងមិត្ដភាព គឺមានសម្រាប់បេក្ខជនទាំងអស់ ដូច្នេះកម្មវិធីនោះ ផ្ដោតជាសំខាន់បំផុត ទៅលើការបង្កើតមិត្ដភាព។

ដោយឡែក ចំពោះពាន Best Evening Wear គណៈកម្មការឱ្យតម្លៃខ្ពស់ទៅលើរ៉ូបគ្រប់ឈុត ដែលនាងស្លៀក នៅលើឆាកថា សុទ្ធតែស្អាតទាំងអស់។ ចំពោះរ៉ូបដ៏ស្រស់ស្អាតនេះ ពណ្ណាវឌ្ឍន៍ បានសរសើរ និងថ្លែងអំណរគុណដល់ហាងកាត់សម្លៀកបំពាក់ Paradise មិនដាច់ពីមាត់ចំពោះការច្នៃម៉ូតរ៉ូប ប្រកបដោយភាពច្នៃប្រឌិតនេះ។ នាងនិយាយថា៖” ដូចបងដឹងហើយថា ទាំង ៥៥ ប្រទេសគេមានអ្នកច្នៃម៉ូតផ្សេងៗគ្នា ហើយប្រទេសគេ ក៏មិនមែនច្នៃម៉ូតអន់ដែរ គ្រាន់តែថា វាមានទាំងរ៉ូបស្អាតផង ហើយអ្វីដែលសំខាន់នោះ យើងអ្នកស្លៀកហ្នឹង យើងត្រូវមានសមត្ថភាពបញ្ចេញដូចជាថា នៅពេលយើងដើរ យើងត្រូវចេះសម្ដែងឱ្យត្រូវជាមួយរ៉ូប ដើម្បីទទួលបានចំណាប់អារម្មណ៍ពីគណៈកម្មការវាយតម្លៃ”។

បើតាមការឱ្យដឹងរបស់កញ្ញា ពណ្ណាវឌ្ឍន៍ ការឡើងប្រកួតលើឆាកអន្ដរជាតិបែបនេះ មិនត្រឹមតែធ្វើឱ្យរូបនាងទទួលបានកិត្ដយស និងភាពសប្បាយរីករាយប៉ុណ្ណោះទេ ប៉ុន្ដែវាបានផ្ដល់បទពិសោធន៍ល្អជាច្រើនដល់រូបនាង។ នាងប្រាប់ថា៖” ចំពោះនាងខ្ញុំ នាងខ្ញុំបានទទួលបទពិសោធន៍យ៉ាងច្រើន នៅពេលនាងខ្ញុំទៅប្រកួត នៅក្នុងកម្មវិធីអន្ដរជាតិមួយហ្នឹង ដោយសារតែវាមានដល់ទៅ ៥៥ ប្រទេស ហើយប្រទេសនីមួយៗ គាត់មានអារ្យធម៌ និងវប្បធម៌ខុសៗគ្នាដូចជាប្រទេសយើង ដែលយើងទៅហ្នឹង យើងមានក្បាច់គុនបុរាណខ្មែរល្បុក្កតោ អ៊ីចឹងប្រទេសផ្សេងៗ គេក៏មានការសម្ដែងរបស់គេដែរដូចជា ការរាំរបាំ ព្រមទាំងមានភាពខុសប្លែកគ្នាទាំងការតុបតែងកាយ ការស្លៀកពាក់ និងចរិតលក្ខណៈ អ៊ីចឹងមានឱកាសសិក្សាពីចរិតលក្ខណៈរបស់បេក្ខនារី ដែលមកពីប្រទេសផ្សេងៗ”។

នៅពេលសាកសួរតើនាង មានរងសម្ពាធផ្លូវអារម្មណ៍ ដែរឬទេ នៅពេលឡើងប្រកួតលើឆាកអន្ដរជាតិបែបនេះ កញ្ញា ពណ្ណាវឌ្ឍន៍ និយាយថា នៅក្នុងការប្រកួតនីមួយៗ ទោះបីមានបញ្ហាអ្វីកើតឡើងក៏ដោយ រូបនាងពុំដែលដាក់សម្ពាធទៅលើខ្លួនឯង នៅវគ្គផ្ដាប់ព្រ័ត្រឡើយ ពីព្រោះវគ្គផ្ដាច់ព្រ័ត្រ គឺជាថ្ងៃ ដែលយើងត្រូវបញ្ចេញសមត្ថភាព ដើម្បីទទួលបានពានរង្វាន់ ដូច្នេះប្រសិនបើយើងដាក់សម្ពាធលើខ្លួនឯង យើងប្រាកដជាមិនអាចធ្វើវាបានល្អនោះទេ។ នាងបន្ថែមថា នាងសប្បាយចិត្ដខ្លាំងណាស់ ដោយសារមុនឈានដល់វគ្គផ្ដាច់ព្រ័ត្រ គេមានវគ្គជម្រុះក្រោយការប្រកួតសម្ដែងទេព្យកោសល្យ ក្នុងចំណោមបេក្ខនារី ៥៥ នាក់ ហើយរូបនាង បានជាប់ទៅបន្ដវគ្គផ្ដាច់ព្រ័ត្រ ក្នុងចំណោមបេក្ខនារី ៩ នាក់(Top 9)។ នាងពិតជាសប្បាយចិត្ដណាស់ ដោយសារតែ នៅពេលនាងចេញទៅប្រកួតលក្ខណៈអន្ដរជាតិ តំណាងឱ្យកម្ពុជា ត្រូវបានទស្សនិកជនហ៊ោកញ្ច្រៀវអបអរសាទរ ពេញទាំងព្រឹត្ដិការណ៍ ក្រោយពីនាងសម្ដែងទេពកោសល្យ លើក្បាច់បុរាណខ្មែរល្បុក្កតោចប់ ដូច្នេះនាងមានអារម្មណ៍ថា ខ្មែរយើងក៏មានទេពកោសល្យអស្ចារ្យ ដើម្បីទាក់ទាញក្រសែភ្នែកភ្ញៀវអន្ដរជាតិ មិនចាញ់ប្រទេសដទៃឡើយ។

នៅអំឡុងពេលប្រកួតនៅប្រទេសចិន បទពិសោធន៍សំខាន់បំផុត ដែលនាងទទួលបាន គឺការបង្កើតមិត្ដភាព និងទំនាក់ទំនងល្អជាមួយបេក្ខនារីមកពីប្រទេសដទៃ ដោយសារកម្មវិធីនោះផ្ដោតទៅលើការចែកចាយនូវវប្បធម៌ និងអារ្យធម៌ នៅលើពិភពលោក អីចឹង ក្នុងនាមនាងជាកូនខ្មែរមួយរូប ដែលតំណាងឱ្យប្រទេសកម្ពុជា ទៅប្រកួតនៅប្រទេសចិន នាងបានរៀបចំគ្រប់បែបយ៉ាង ដែលទាក់ទងទៅនឹងប្រទេសកម្ពុជា ដើម្បីឱ្យភ្ញៀវអន្ដរជាតិ បានស្គាល់ថា ប្រទេសកម្ពុជាយើង ក៏ជាប្រទេសមួយ ដែលមានសមត្ថភាព ក្នុងការចូលរួមប្រកួត នៅលើឆាកអន្ដរជាតិដែរ។

សូមជម្រាបជូនផងដែរថា ការប្រកួតបវរកញ្ញាទេសចរណ៍អន្ដរជាតិ Miss Tourism Queen of the Year International 2016/17 ដែលប្រព្រឹត្ដិទៅ នៅទីក្រុងសៀងហៃប្រទេសចិន ចាប់ពីថ្ងៃទី ២៨ ខែវិច្ឆិការ ដល់ថ្ងៃទី ១៨ ខែធ្នូ ឆ្នាំ ២០១៦ កន្លងទៅនេះ មានបេក្ខនារី ចូលរួមពីបណ្ដាប្រទេសចំនួន ៥៥ ដូចជា ចិន(ម្ចាស់ផ្ទះ) កម្ពុជា រ៉ូម៉ានី អូស្ដ្រាលី ឥណ្ឌា ហ្វីលីពីន វៀតណាម។ល។ បេក្ខនារី ដែលទទួលបានម្កុដកញ្ញាឯកទេសចរណ៍អន្ដរជាតិ គឺបេក្ខនារីមកពីប្រទេសឈីលី។ ជ័យលាភីលេខ ២ បានទៅលើបេក្ខនារីមកពីប្រទេសចិន ជ័យលាភីលេខ ៣ បានទៅលើបេក្ខនារីមកពីប្រទេស រ៉ូម៉ានី ជ័យលាភីលេខ ៤ បានទៅលើបេក្ខនារីមកពីប្រទេសអូស្ដ្រាលី និងជ័យលាភីលេខ ៥ បានទៅលើបេក្ខនារីមកពីប្រទេសឥណ្ឌា។

ជាចុងក្រោយ កញ្ញាឯកកម្ពុជាលេខ ៤ ដែលមានឆន្ទៈចង់ក្លាយជាអ្នកបម្រើលើយន្ដហោះ(Flight Attendant) កញ្ញា ប៉ែន ពណ្ណាវឌ្ឍន៍ បានផ្ដល់ជាសារដល់សុភាពនារីកម្ពុជាគ្រប់រូបថា ត្រូវមានភាពក្លាហាន ក្នុងការបញ្ចេញសមត្ថភាពរបស់ខ្លួន។ ជាដំបូង យើងត្រូវស្វែងរកថា តើយើងត្រូវធ្វើយ៉ាងណាដើម្បីឱ្យខ្លួនឯងមានសមត្ថភាព ហើយត្រូវបានបញ្ចេញនូវអ្វី ដែលខ្លួនមាន៕